Kreu i PAA-së, Agron Duka, ka deklaruar se ka një mundësi që marrëveshja Basha-Rama të rrëzohet.
Duke folur për ankimimet në Kolegj, Duka tha se atje ka edhe një padi tjetër, për shpalljen të paligjshme të listave të kandidatëve.
“Nëse Kolegji e pranon atë kërkesë, atëherë e gjithë marrëveshja Basha-Rama bie poshtë”, tha Duka duke folur për “Opinion”.
Siç dihet Kolegji Zgjedhor shtyn për më 22 maj shqyrtimin e ankimimit të Partisë Aleanca Popullore, e cila kërkoi të shpallen të pavlefshme listat e kandidatëve për deputetë të regjistruar për zgjedhjet e 18 qershorit.
Kolegji vendosi të thërrasë 15 partitë që janë regjistruar tashmë, pasi i pranishëm në sallë ishte vetëm përfaqësuesi i Partisë Socialiste.
Në fund të vendimit, kreu i partisë Aleanca Popullore Artur Dojaka, theksoi se nuk do të tërhiqet për ankimimin pranë Kolegjit Zgjedhor, pavarësisht arritjes së marrëveshjes Rama-Basha.
Nëse Kolegji Zgjedhor shpall të pavlefshme listat e kandidatëve për deputetë, atëherë data e zgjedhjeve shtyhet dhe procesi hapet nga fillimi.
