Themeluesi i Microsoft, Bill Gates, në një intervistë të dhënë për CNN, është shprehur optimist për një vaksinë, por në të njëjtën kohë paralajmëron për situatën në dimër.
Ai ka thënë se 6 muajt e ardhshëm janë vendimtarë, ndërsa në treg ende nuk kemi një vaksinë. Jemi në stinën e dimrit, dhe kjo e vështirëson edhe më tej situatën.
Deri në ardhjen e pranverës pritet të lehtësohet gjëndja, për shkak të vaksinave dhe motit të ngrohtë. Por aktualisht bilanci me të infektuarit është tejet i rëndë.
“Ne duhet të shqetësohemi shumë për 6 muajt e ardhshëm”, tha Gates. “Duhet pritur që numri i vdekjeve ditore në SHBA do të vazhdojë të jetë 2.000 ose më shumë. Situata duhet të lehtësohet vetëm në pranverë, ndër të tjera për shkak të vaksinave dhe motit më të ngrohtë”, ka thënë ai.
Gates e sheh zhvillimin e vaksinave në rrugën e duhur. Sipas tij, të gjitha vaksinat do të jenë efektive. “Pothuajse të gjitha vaksinat do të funksionojnë, dhe do të jenë shumë efektive”, tha Gates.
Në Shtetet e Bashkuara, 26 nëntori, Dita e Falënderimeve, është një festë e rëndësishme që zakonisht pret festime të mëdha familjare. Prandaj, Gates u bën thirrje bashkëqytetarëve të tij që të jenë të kujdesshëm, veçanërisht gjatë pushimeve dhe të shmangin takimet e mëdha.
