Ambasadori i Shqipërisë në Kinë, Selim Belortaja, ka reaguar fort ndaj të gjithë atyre që pretentojnë se koronavirusi është grip i përmasave më të lehta. Mjaft i indinjuar lidhur me qëndrimet pasive, apo talljeve se ne si popull jemi rracë e fortë dhe se çdo gjë do kaloj mjaft lehtë, ai kërkon nga të gjithë që ta shohim me një tjetër sy këtë realitet që po jetojmë. Për të, rrisku është i madh. Ambasadori ka një mesazh mjaft të fortë ndaj qeverisë, për të mos e kaluar infektimin nga koronavirusi me gallata e qyfyre bajate.
Statusi
Asgjë e re s’ka ndodhur. Ato 2-3 ishujt e vegjël, s’mund të qëndronin për shumë kohë gri. Me Italinë ne ishim thuajse “njësh” me avionat dhe tragetet e përditshme. Bashkimi me “hartën e kuqe” aty ishte, sot vetëm sa u zyrtarizua.
Kjo është keq sigurisht, por ka dhe një të mirë: uljen tonë me këmbë në tokë! Mbylljen e stacionit të ..Gallatës! Stopin e ..qyfyreve, kunjave e shakave tona bajate, të folklorizmave si ..“është si punë gripi, po ..një çikë me i fortë se gripi”! apo “jemi rracë e fortë”; te këshillave qesharake si ….”hani limona e pini raki”! “është kot kjo e kot ajo…”, etj.
Ngjeshjes e gajasjes sonë të papërgjegjshme nëpër kafe, restorante, salla, stadiume dhe autobuza edhe ..për 1 stacion! Të gjithë duhet të shkundemi. Ndryshe doemos ..do të na shkundë!
Kujtojmë këtu se zbulimi i dy rasteve me koronavirus në Shqipëri ka bërë që qeveria të marrë masa duke mbyllur shkollat dhe ndaluar të gjitha aktivitetet publike deri më datë 3 prill. Dy të prekurit janë babë e bir.
