Barcelona me fitoren e arritur përballë Atletico Madrid në “Camp Nou”, mund ta quaj të mbyllur kapitullin e titullit kampion. Katalanasit fituan me një gol të shënuar që në minutën e 26’, nga Lionel Messi. Ishte një ndeshje me jo aq shumë emocione sesa pritej, por goli i 600-të i Messi-t vendosi gjithçka dhe Barça tani ka tetë pikë avantazh nga skuadra e Simeone-s.
Ndeshja nisi ashtu si pritej me të dyja ekipet të kujdesshme dhe “lufta” zhvillohej në mesin e fushës. Rastet për gol mungonin dhe ndeshja kishte shumë ndalesa për shkak të faulleve të shumtë. Lajmi i keq për Barcelona-n erdhi në minutën e 19’, kur Iniesta duhet të dilte nga loja i dëmtuar.
Por në minutën e 26’ ndryshoi gjithçka. Messi merr përsipër një goditje dënimi të cilën e kishte fituar vetë. Pozicionohet dhe godet në mënyrë fantastike me topin që shkon në trekëndëshin e djathtë që ishte i pamundur për t’u kapur nga portieri Jan Oblak. Goli i 600-të për klubin dhe përfaqësuesen. Një legjendë.
Barcelona luan më e liruar psikologjikisht pas golit dhe Suarez me Coutinho kanë mundësi të mira për të dyfishuar rezultatin që në pjesën e parë. pas pushimit ndeshja nuk pati shumë momente kulmore pasi Atletico ishte i pafuqishëm për të sulmuar dhe krijuar raste për gol. Diego Costa ishte një anonim, po ashtu edhe Griezmann. Në fund të takimit Suarez shënon një gol që anulohet për pozicion jashtë loje, ndërsa Oblak mban ekipin e tij në lojë pas një goditje të përsosur të Busquets.
