Kryetarja e LSI-së mblodhi sot të gjithë krerët e degëve, për të folur mbi aksionin politik të opozitës pas 25 korrikut. Monika Kryemadhi tha se 25 korriku është shumë i rëndësishëm dhe i veçantë, për sa i përket ngjarjes dhe zhvillimit politik që do të marrë LSI-ja në të ardhmen. Në të njëjtën kohë u fokusua edhe tek protesta e 7 korrikut të thirrur nga Sali Berisha, teksa iu bëri thirrje njerëzve që t’i bashkohen tubimit. Ajo u shpreh se qëllimi nuk është për të protestuar për partitë politike, por për veten e tyre. Për të, 7 korriku është për të treguar se në protestë nuk janë vetëm partitë politike, por edhe qytetarët.
“Duhet të jemi shumë të përgatitur, sa i përket prezencës sonë në fushatë, për shkak të rezultatit në zgjedhjet e 2019, që erdhi si pasojë e bojkotit tonë.
25 korriku është Konventa Kombëtare që ne do e zhvillojmë në Pallatin e Kongreseve. Numri i delegatëve nuk kalon mbi 800. Ne do të vendosim një lloj koordimi për pjesëmarrjen e delegatëve, edhe të atyre që janë jashtë shtetit, nëse kanë apo mundësi për të ardhur.
Ne e dimë shumë mirë se data 25 ka shumë rëndësi të veçantë për ne, për sa i përket ngjarjes dhe zhvillimit politik që do të marrë LSI-ja në të ardhmen. Prandaj, duhet që ta marrim seriozisht.
Mendoj se do të kemi një plan masash dhe një prezantim, që do duhet ta shpalosim në Konventë. Para 25 prillit është protesta e datës 7 korrik, që është shumë e rëndësishme. Nuk është e rëndësishme për ta pasur si organizim politik, por për të sensibilizuar njerëzit, që të dalin dhe të protestojnë.
Të mos protestojnë për partitë politike, por për veten e tyre. Është shumë e rëndësishme t’i njoftojmë njerëzit, t’i shpërqendrojmë nga ajo indiferencë që kanë. 7 korriku është për të treguar se në protestë nuk janë vetëm partitë politike, por edhe qytetarët”, tha Kryemadhi.
