Kreu i Partisë Demokratike, Lulzim Basha i pyetur nga gazetarët nëse është i gatshëm të ulet në një tryezë e të dialogojë pa kushte me kryeministrin Rama, kreu demokrat tha se zgjidhja politike është vetëm një, Rama duhet të largohet.
Në një konferencë për media, Basha tha se s’ka qenë ndonjëherë mik i Ramës, ndryshe nga deklaratat e kryeministrit drejtuar atij.
“Nuk kam qenë asnjëherë miku i Edi Ramës. Edi Rama i ka zgjedhur miqtë e tij, disa janë kriminelë të dënuar, disa oligarkë, disa pronarë mediash, disa shfaqin miqësinë hapur, marrin favore ditën dhe natën. Por kjo nuk është beteja ime personale.
Përballjen me njëri-tjetrin e kam fituar me të. Nuk jam nisur të përballem me të. Rama nuk mund të jetë kujdestar i një procesi zgjedhor pasi është kapur nga prokuroria duke vjedhur tre palë zgjedhje. Përdhunuesi serial i zgjedhjeve nuk mund të jetë kujdestar i zgjedhjeve të ardhshme.
Edhe socialisti më i thekur 24 karat, do thoshte çfarë të dha, si të bleu. Asnjë shqiptar nuk beson më se do ketë zgjedhje me Edi Ramën. Nuk ka njeri që e beson se me Edi Ramën mund të ketë proces të lirë zgjedhor. Me gjithë këto skandale në Europë Rama jo vetëm që nuk do ishte kryeministër por do ishte para drejtësisë, i dënuar”, deklaroi Basha.
Ndërkohë, Basha është pyetur edhe për platformën që do të përdorë PD për të ndaluar zhvillimin e zgjedhjeve lokale në 30 qershor, Basha tha se vetë Rama në të kaluarën ka shtyrë zgjedhjet, ndërsa nënvizoi se protestat e njerëzve të irrituar nga kjo qeverisje nuk do të lejojnë që kjo datë të jetë data e zhvillimit të zgjedhjeve.
“Kjo që ka deklaruar Rama tregon sesa në panik ndodhet. Nuk besoj se është rënduar aq shumë sa të mos kujtojë se më 2007 shtyu zgjedhjet. Këta janë të gjitha vetëm pretendime. Rama ka marrë peng karrigen e kryeministrit me krimin e organizuar dhe thotë se është i kërcënuar. Nga kush është i kërcënuar? Nga krimi. Edhe ndodh. Nëse ndodh që kryeministri kërcënohet nga krimi i organizuar, imagjino se çfarë mund të ndodhë me popullin”, tha Basha.
