Për fat të keq, gjatë ditëve të fundit janë regjistruar një sërë ngjarjesh të rënda të abuzimit seksual me të mitur. Ministri i Brendshëm, Sandër Lleshaj, ka komentuar rastet e rënda që janë pasqyruar në media.
Lleshaj ka reaguar për arrestimin e shefit të komisariatit të Fushë-Arrëzit, pas denoncimit të një vajze se ishte përdhunuar nga ai. Ai e cilësoi sjelljen e zyrtarit të policisë, si gjest të ulët dhe kriminal.
“Ka ardhur koha të rishikojmë në thelb qasjen tonë për mbrojtjen e viktimave të dhunës seksuale, veçanërisht fëmijëve.
Pasi shumë prej rasteve vijnë nga kujdestarët, rojet dhe është për të ardhur keq. Duhen shtuar penalitetet dhe duhen çuar në ekstrem penalitetet për kujdestarët.
Nuk është thjesht çështje e ligjit, por edhe e sensibilizimit shoqëror. Duhet të reagojmë thellë si shoqëri. Dënimi me vdekje i stërdiskuatuar nuk ka kthim, është i pakthyeshëm.
Kemi reaguar pas sinjalit të parë, dhe nuk i dimë detajet, por do të marrim masa më të forta. Rreziku vjen shpesh për ata që janë vendosur për të bërë rojën, pra kujdestarë”, u shpreh Lleshaj.
