Kryeministri Edi Rama është shprehur se shembja e Teatrit duhej bërë në një kohë, që të mos kishte përplasje me artistët që ishin ngujuar në godinë.
I ftuar në emisionin “Pressing” në Televizionin 7, Rama tha se prej 2 vitesh e gjysmë godina e teatrit nuk kontrollohej nga shteti.
Kreu i qeverisë theksoi se shembja e Teatrit Kombëtar ndodhi pa asnjë lëndim real.
“Nëse do kishte ndodhur në mes të ditës, do thuhej pse në mes të ditës. Duhej evituar kjo përplasje. Por dua të nënvizoj se godina e vjetër e teatrit kombëtar prej 2 vitesh e ca ishte e zaptuar, e marrë peng nga një grup njerëzish, nuk kontrollohej nga shteti. Ata pretendonin se përfaqësonin të gjithë popullin teatror.
Shteti e kishte të pamundur të kishte administrimin normal. Nuk kemi dashur të krijonim një konflikt kur ende procesi ishte në fazë embrionale. Ndërhyrja ndodhi pa asnjë lëndim real”, tha ai.
I pyetur se pse nuk pati një kompromis por u vendos për shembjen e godinës, Rama tha se Teatri ishte në atë fazë ku nuk mund të restaurohej më.
“Ky është debati më i gjatë në historinë e këtij vendi. Ajo ngrehinë nuk plotëson asnjë kusht që mund të zhvillohet aktiviteti në mënyrë të sigurtë. Mundësia për ta restauruar është pothuajse zero”, shtoi ai.
