Biznesmeni Petrit Laze i cili mbeti i plagosur bashkë me gruan e tij, në dëshminë e dhënë për policinë ka deklaruar se grabitësit kanë qenë të veshur me të zeza dhe të armatosur. Ata i kanë kërkuar kasafortën, dhe më pas kanë tentuar ta lidhin me natriban, por janë përleshur.
Plagosja në Allias/ Në kërkim i afërmi dhe fqinji i biznesmenëve
“Dëgjova zhurmë që u hap dera dhe dola për të parë. Pashë dy të rinjtë të gjatë të maskuar, dhe veshur me kapota të gjata dhe të zeza. Njëri kishte pistoletë në dorë, ndërsa tjetri një armë tjetër më të gjatë.
Më thanë; ‘duam lekët’! Ku e keni kasafortën?”. Në dorë mbanin një ngjitës natriban dhe u turrën të më lidhnin. U përleshëm dhe më qëlluan. Pastaj qëlluan dhe Afërditën. Ne ulëritëm, kërkuam ndihmë dhe ata u larguan me vrap”, ka thënë biznesmeni Laze.
Tre ditë më parë, në zonën e njohur si Allias në Tiranë, ata u plagosën nga dy persona teksa ndodheshin brenda banesës së tyre. Autorët hynë në banesë për të grabitur dhe pas përballjes me familjarët, qëlluan me armë.
