Festimet për 28 nëntorin, në 110-vjetorin e Pavarësisë kanë kulmuar mbrëmjen e djeshme me festivalin e këngëtares me famë botërore, Dua Lipa në sheshin “Skënderbej”.
Koncerti ka nisur me këngëtaren Elvana Gjatën dhe këngën Kuqezi. Mijëra qytetarë kanë shijuar performancën e Dua Lipës në sheshin “Skënderbej” në Tiranë. Ajo është ngjitur në skenën e madhe dhe ka elektrizuar me performancat e saj.
Në nisje të koncertit, ajo u shpreh se nga Tirana mbyll turneun e saj.
“Faleminderit shumë, urime 110 vjetorit të pavarësisë. Faleminderit për suportin, për energjinë që po na jepni sot. Kjo është nata e fundit e turneut, këtu sot përfundojmë në Tiranë me ju. Faleminderit shumë që jeni këtu”, tha ajo. Gjatë performancës, Dua Lipa përshëndeti te gjithë duke bërë edhe simbolin e shqiponjës.
