Kryetarja e Bashkisë së Shkodrës, Voltana Ademi ka qartësuar deklaratën që bëri mbrëmjen e djeshme në emisionin ‘Open’, ku tha se disa drejtuese të larta të PS-së në Shkodër janë përdhunuar.
Ademi e ka mohuar këtë deklaratë, duke thënë se nuk bëhet fjalë për përdhunimin e grave, por me faktin që fuqia politike është e inkriminuar.
“E para në asnjë rast, nuk kam thënë një gjë të tillë. Nuk ka lidhje me përdhunimin e femrave. Korrupsioni, krimi, pjesa që lidhet me marrjen në dorë të fuqisë politike që është e inkriminuar, padyshim që ndërhyn në çdo drejtues dhe te ata bëhet më e vështirë. Në këtë rast po flas jo te ata që janë të PD-së, që e kanë pasur të vështirë që të përballen edhe për çështjet që kanë lidhje me vendimmarrje të detyruar për interesa politike”, tha Ademi.
Kryebashkiakja foli dhe për lidhjet e politikës me krimin, gjë që bllokon në një mënyrë a tjetër që zyrtarët të bëjnë detyrën, qoftë ata nga PD e qoftë ata nga PS.
“Ne kemi pasur drejtues që janë të policisë që janë përpjekur dhe i kam ofruar bashkëpunimin dhe me mundësitë e tyre kanë punuar, por fakti që nuk janë ndihmuar në kohë dhe nuk kanë instrumentet, jo vullnet. Nuk bëhet me polici rrugore, por për një situatë më të agravuar, përgjegjësia duhet të jetë më e madhe dhe në këtë rast kam detyrën ta them se nuk ka ndodhur në Shkodër”, deklaroi Ademi.
