Drejtori i Përgjithshëm i Policisë së Shtetit, Ardi Veliu i ftuar në ‘News 24’ tha se puna e tij është të menaxhojë, por edhe të motivojë policët për të çuar përpara një organizatë si Policia e Shtetit.
Duke u ndalur tek vrasjet në Shkodër, Veliu tregoi pse u shkarkua drejtuesi i policisë në atë qytet, Vehbi Bushati.
Sipas tij, drejtori u largua nga detyra pasi kërkojnë t’i japin një impuls tjetër organizatës, ndërsa paralajmëron se do bëhen ndryshime të tjera edhe në Elbasan.
“Ajo që ndodhi në Shkodër është një ngjarje e rëndë, pavarësisht masave të marra. Policia atje gjatë 2018 ka qënë shumë prezante, është një nga qarqet ku ka ndërthurje të grpeve kriminale dhe fenomenit të gjakmarrjes. Nëse i referohem statistikave dua të jem konkret. Themi situatë të rënduar por përqindja e veprave penale të evidentura në Shkodër në 2018 është vetëm 7%, krahasuar me gjithë Shqipërinë. Drejtori lëvizi për shkakun se duam t’i japim një impuls tjetër, për një ritëm tjetër. Do bëjmë edhe ndryshime të tjera, edhe në Elbasan”, tha Veliu.
