Gjykata e Tiranës ka vendosur pushimin e çështjes Balla- Basha- Nuhu, me datën 18 shtator, me kërkesë të organit të akuzës. Kujtojmë këtu se një vit më parë, kryetari i grupit të PS, Taulant Balla, kallëzoi me deklarim të rremë kryedemokratin Basha, oficerin e policisë Emiljano Nuhu dhe gazetarin Basir Çollaku, për çështjen Xhisiela.
Në atë periudhë, opozita hodhi sulme të ashpra ndaj Taulant Ballës, se mbrojti djalin e deputetit të Krujës. Kjo e çoi Ballën në kallëzimin penal ndaj personave në fjalë, të akuzuar për tre vepra, “shpërdorim detyre”, “shpifje” dhe “fyerje” për rastin e Xhisiela Malokut.
Një vit më parë, Xhisiela Maloku u bë qendra e vëmendjes mediatike, pasi denoncoi djalin e deputetit socialist Rrahman Rrahja, Rexhep Rrahjan, për përdhunim. Ky denoncim, sipas saj, është bërë sepse ndihej e ngarkuar emocionalisht, dhe se e kishte zgjidhur mosmarrëveshjen me Rexhep Rrahjan. Por ky justifikim, nuk u besua nga mediat dhe policia, duke arrestuar Rexhep Rrahjan, që u la i lirë në dhjetor të 2018.
