Kryeministri Edi Rama ka reaguar sërish për dosjen “Rraja”. Në përgjigje të deklaratës së PD-së se arrestimi i djalit të deputetit socialist ishte vetëm një truk për të mbyllur një skandal të madh politik, Rama thotë se demokratët po përdorin Xhisiela Malokun për betejat e tyre politike.
“E kanë kapur vajzën si të ishte një dru për të shembur portën dhe vijojnë me yryshin e politikës së tyre të dëshpëruar.Asnjë fjalë mbështetjeje për prokurorinë. Përkundrazi, veç baltë pa asnjë fre tanimë”.
Për Ramën, edhe njëherë shqiptarët e bëjnë qartë dallimin mes mazhorancës dhe opozitës.
Më herët PD tha se bashkë me Rexhep Rrajën, para drejtësisë duhet të ishte Rrahman Rraja, Taulant Balla dhe Artur Bushi, të pranishëm në kërcënimin me pistoletë në kokë të nënkomisar Emiljano Nuhut për të mbyllur çështjen.
Sipas selisë blu, arrestimi i djalit të deputetit të PS është një truk për të mashtruar opinionin publik, sepse në burg, bashkë me të, duhet të ishin shefat e komisariateve që, gjatë gjithë këtyre muajve, mbajtën anën e kriminelit dhe jo të vajzës së dhunuar apo të policit të kërcënuar.
