Në momentin kur të gjithë shqiptarët presin me padurim vendimin e BE-së për hapjen e negociatave me vendin tonë, duket se kreu i qeverisë nuk është aspak i qartë se kur mund të ndodhë kjo gjë.
Në një intervistë që kryeministri Edi Rama dha për televizionin gjerman ARD, me degën e tij në Vjenë deklaron se nuk e di se kur do të hapen negociatat.
Kryeministri theksoi se Shqipëria e meriton që t’i hapen negociatat dhe për këtë ka një rekomandim të qartë nga ana e Komisionit Evropian se nuk e kupton se si kjo makineri (BE) që paguhet me miliarda që të bëjë raporte të sfidohet në mënyrë aspak objektive. Nuk është koha për të kërkuar asgjë që ka lidhje me një datë konkrete.
“Nuk është koha për të kërkuar asgjë që ka lidhje me një datë konkrete. Ne nuk jetojmë në një botë ku ne mund të adresojmë preferenca lidhur me gjëra që janë të pamundura. Ne jetojmë në një botë ku gjërat mund të bëhen të mundura. Ajo që do të preferoja është irrelevante. Ajo që është e rëndësishme është se Shqipëria e meriton që t’i hapen negociatat dhe për këtë ka një rekomandim të qartë nga ana e Komisionit Evropian dhe nuk e kuptoj se si kjo makineri (BE) që paguhet me miliarda që të bëjë raporte të sfidohet në mënyrë aspak objektive. E di që shumë vende kanë problemet e tyre të brendshme por unë besoj fort në shpirtin e Evropës. Dhe shpirti i Evropës ka një qasje të drejtë dhe strikte. Shpresoj që kjo të mos përfundojë në mënyrë të padrejtë,” deklaroi Rama.
