Pas lajmërimit të kryeministrit italian Giussepe Conte se do të dërgojë tek presidenti i vendit kërkesën për dorëheqje, ka ardhur edhe reagimi i zv.kryeministrit, Matteo Salvini.
Conte e mori këtë vendim, pas qëndrimeve që Salvini kishte lidhur me prishjen e bashkëpunimit në koalicion, teksa ky i fundit është shprehur se nuk pendohet për asgjë.
“Nuk pendohem për asgjë. Do ribëj gjithçka me të njëjtën forcë për të qenë njeri i lire…Nuk dua një Itali skllave të askujt”, tha Salvini.
Sipas mediave italiane, Conte deklaroi sot në Senat se Salvini është treguar i “papërgjegjshëm” duke çuar në krijimin e një krize të re politike për Italinë për “interesa personale dhe partiake”.
“Unë kërkova të ndërhyja për të raportuar për krizën e qeverisë të shkaktuar nga deklaratat e ministrit të brendshëm dhe udhëheqësit të njërës prej dy forcave mazhoritare. Vendimi për të shkaktuar krizën është i papërgjegjshëm. Në këtë mënyrë, Ministri i Brendshëm ka treguar se po ndjek interesat personale dhe partiake”, tha ai.
“Kjo krizë ndodh në një moment delikat të dialogut me institucionet e BE. Këto ditë negociatat do të përfundojnë për komisionerët dhe unë kam punuar për të garantuar një rol qendror në Itali. Është e qartë se Italia rrezikon të marrë pjesë në këto negociata në kushte të dobësisë objektive. Mbaj mend për shembull që tani kemi vetëm një plan tarifor për autostradat, reformën sportive, caktimin e Lojërave Olimpike Dimërore, kjo është një qeveri që ka punuar intensivisht deri në ditën e fundit”, u shpreh kryeministri Conte.
“Kriza aktuale kompromenton veprimin e kësaj qeverie që ndalet këtu. Në fund të këtij debati, unë do të shkoj te Presidenti i Republikës për të dhënë dorëheqjen”, tha Conte në fjalën e tij të mbajtur në Senat.
