Pas debateve të shumta në lidhje me ligjshmërinë apo paligjshmërinë e arrestimit e deputetëve, por duke marrë shkas nga ish-ministri Tahiri, Partia Socialiste kërkon të qartësojë procedurat dhe rregullat e arrestimit, duke vendosur si parakusht, paraqitjen e provave nga ana e Prokurorisë .
Grupi parlamentar i PS-së ka depozituar një projektligj në Parlament, ndërsa kërkojnë ndryshimin e rregullores së Kuvendit në lidhje me autorizimin për arrestimin e deputetëve apo edhe ministrave, me kërkesë të Prokurorisë.
“Sipas propozimit, deputeti apo ministri nuk mund të arrestohet më në bazë indicesh apo dyshimesh të arsyeshme, por organi i akuzës duhet të paraqesë prova bindëse, në të kundërtën kërkesa për arrestim rrëzohet. Këto kërkesa vijnë menjëherë pas debateve të shumta në lidhje me ministrin Tahiri, por edhe pak para organeve të reja anti korrupsion, si Byroja Kombëtare e Hetimit , Prokuroria dhe Gjykata e Speciale ose i njohur ndryshe si SPAK”-shkruan Shqiptarja.com
Varianti i PS
“Në variantin e propozuar nga Partia Socialiste, shtohen disa elemente të reja, por shumë të rëndësishme, për arrestimin deputetëve. Konkretisht, në pikën 1 të nenit 118 të Rregullores së Kuvendit, është saktësuar se, kërkesa e prokurorisë përmban një relacion të arsyetuar dhe të shoqëruar me provat që mbështesin kërkesën. Në rregulloren në fuqi, nuk përmendeshin prova, por vetëm materiale shoqëruese. Deri më tani Prokuroria ka kërkuar arrestimin e deputetëve bazuar në indicie dhe dyshime të arsyeshme. Kjo ka sjellë edhe përplasje të forta mes palëve politike”
Projektvendimi by Tirana Today on Scribd
Seanca me dyer të mbyllura, votim i fshehtë
Një tjetër ndryshim ka të bëjë me zhvillimin e seancës. Në nismën e depozituar në Kuvend, nenit 118, i është shtuar një pikë e cila parashikon që Kuvendi, në seance plenare, për arsye të mbrojtjes së të dhënave, mund të zhvillojë diskutimin me dyer të mbyllura. Në rregulloren në fuqi të Kuvendit nuk parashikohet mundësia që seanca të zhvillohet më dyer të mbyllura. Projektvendimi parashikon edhe ndryshimin e mënyrës së rregullore.
Sipas nismës së re, Kuvendi vendos me votim të hapur për miratimin ose rrëzimin e kërkesës për dhënie autorizirni për procedim. Në rregulloren në fuqi të Kuvendit, në paragrafin e fundit të pikës 4, të nenit 118, parashikohet që Kuvendi vendos me votim të fshehtë nëse do të jepet ose do të rrëzohet dhënia e autorizimit për fillimin e ndjekjes penale ndaj deputetit.
KERKESA-E-GRUPIT-1 by Tirana Today on Scribd
Shkurtohet koha
Projektvendimit parashikon shkurtimin e kohës në dispozicion të Këshillit për Rregulloren Mandatet dhe Imunitetin për hartimin e raportit, me anë të të cilit rekomandon dhënien apo jo të pëlqimit për arrestimin e deputetit. Projektvendimi parashikon që Këshilli brenda një jave, harton raportin për në seancë plenare. Ndërsa, Rregullorja e Kuvendit në fuqi parashikon që në përfundim të shqyrtimit, Këshilli, brenda 4 javëve, harton një raport për në seancë plenare.
