Kryeministri Edi Rama e ka tërhequr zyrtarisht padinë për shpifje ndaj ish-kryeministrit të Kosovës, Ramush Haradinaj.
Aktvendimi ku konstatohet tërheqja e padisë është publikuar nga media kosovare, Gazeta Express.
Gjatë qëndrimit dy ditor në Kosovë, Rama zhvilloi takime me zyrtarë të shumtë të Kosovës, por jo me Haradinajn.
Ky i fundit tha se nuk mund të takohej me dikë që e ka paditur. Kreu i qeverisë njoftoi se do të tërhiqte padinë ndaj Hardinajt, gjatë një konference për mediat në aeroportin e Prishtinës.
“E kam njoftuar që s’do të bëj komunikim me mediat në çdo derë. I kam treguar se do ta tërheq padinë. Jo se ajo është e vogël për mua, por është me e madhe ajo që do të na bashkojë të gjithëve. Nuk e di çfarë roli do të ketë heqja e padisë. Për më tepër me padi, pa padi, Ramushi për mua nuk është kryeministri, politikani, është një prej figurave historike. Kështu që padia do të tërhiqet zyrtarisht”, tha ai.
Rama e ka nënshkruar personalisht tërheqjen e padisë ndaj ish-kryeministrit kosovar.
