Ish-kreu i Emergjencave Cilvile, Shemsi Prençi ngriti dyshime ditën e djeshme se kompania koncesionare ICTS është një kompani qipriote, por që sipas tij aksionet më të mëdha i ka personi që ka mbrojtur Giorgio Riformaton, pilotin italiani i cili në vitin 2015 u rrëzua me avionin e tij në Divjakë.
Sipas ekstraktit të kompanisë në QKB, rezulton se një nga aksionerët më të mëdhenj me 30 për qind, është avokati i Partisë Socialiste, Eno Bushi, i cili njihet edhe si avokati i Riformatos.
Aeroporti “Nënë Tereza” ka kontraktuar për këtë çështje ICTS Albania, një kompani e krijuar në vitin 2005, e që për të dytën herë dështoi të ndalojë vjedhjen brenda aeroportit, ndërsa ka të angazhuar 152 punonjës.
Sipas bilanceve, vetëm në vitin 2017 i janë arkëtuar 2.5 milionë euro me qëllim garantimin e sigurisë në aeroport.
Krahasuar me një vit më parë, të ardhurat e saj janë rritur me rreth 20%, ndërsa në raport me vitin 2014 me 30%, ndërkohë që nga viti në vit të ardhurat e kompanisë përgjegjëse për sigurinë kanë njohur rritje.
Sipas ‘ABC News’, pas grabitjes së 30 qershorit të 2016-ës, vetë shoqëria që menaxhon konçesionin e aeroportit të Rinasit ndryshoi pronësi, duke e marrë nën zotërim China Everbright Limited, një kompani ndërkombëtare investimesh dhe menaxhimi të aseteve e vendosur në Hong Kong.
Por zyrtarisht në Qendrën Kombëtare të Biznesit, kompania e vetme që po menaxhon koncesionin e aeroportit ndërkombëtar në vend që prej 11 nëntorit 2016 është Real Fortress Private Limited. Një kompani offshore, e krijuar në 22 qershor 2016 me adresë në Singapor.
