Një ngjarje makabre ndodhi paraditen e sotme në Krujë, ku një burrë vrau me thikë bashkëshorten e tij, dhe tentoi të vetëvritej. Krimi u shënua në orën 10:45, në një magazinë në Bubq të Krujës. Autori i dyshuar i krimit, 51-vjeçari Artan Ismalaja, me profesion kameraman, teksa ishte në mjetin e tij tip “Ford” bashkë me gruan, Klaritën, 45-vjeçe, në rrethana ende të paqarta kanë hyrë brenda një magazine. Aty ku 51-vjeçari ka vrarë me thikë gruan. Sipas policisë, çifti ka hyrë brenda territorit të objektit duke ndjekur një kamion, i cili është futur për të shkarkuar ushqim për lopët, pasi magazina është stallë lopësh.
Burime nga blutë e Krujës thanë se viktima ka patur shumë shenja thike në trup, ç’ka mendohet, sipas tyre, të jetë tortuar nga bashkëshorti. Nga pohimet e familjarëve të tyre, mësohet se çifti nuk ka patur probleme. Aktualisht 51-vjeçari ndodhet në spital, në gjendje të rëndë për jetën, pasi goditi disa herë me thikë edhe veten.
Ka qenë roja i magazinës që ka njoftuar policinë, pasi ka pikasur makinën tip “Ford”, në të cilën 51-vjeçari Artan Ismalaja qëlloi për vdekje me thikë bashkëshorten e tij 45-vjeçare Klarita. “U afrova për t’i larguar”, mësohet të jetë shprehur ai.
“Fillimisht mendova se ishin në momente intime, dhe u afrova për t’i larguar, por më pas pash viktimën të mbuluar me gjak, atëherë njoftova policinë”, është shprehur punonjësi i sigurisë, në dëshminë e tij për policinë.
Çifti janë prindër të dy djemve, ku më i madhi është 23-vjeç. Ata jetonin prej vitesh në Tiranë. 51-vjeçari është me profesion kameraman, dhe ka një biznes pranë Fakultetit të Inxhinierisë së Ndërtimit në kryeqytet.
Çfarë njoftonte fillimisht policia
“Më datë 05.07.2021, në orën 10:45, në Bubq, Krujë, në afërsi të një magazine, brenda mjetit tip “Ford” në pronësi të tij, dyshohet se shtetasi A. I., 51 vjeç, banues në Krujë, ka goditur me mjet prerës (thikë), bashkëshorten e tij, shtetasen K. I., 45 vjeçe, e cila ka ndërruar jetë. Më pas shtetasi A. I. ka tentuar të dëmtojë edhe veten me mjet prerës (thikë) dhe është transportuar në spital, ku ndodhet nën kujdesin e mjekëve. Grupi hetimor ndodhet në vendngjarje dhe po punon për zbardhjen e rrethanave të ngjarjes”, thuhet në njoftimin e policisë.
