Pasi ka dalë nga mbledhja që zhvilloi në selinë e PS me drejtuesit socialistë në qarqe, kryeministri Rama ka shkëmbyer disa batuta me gazetarët. Ai tha se nuk e kupton se si ata rrinë me orë të tëra, duke priitur të përfundojë çdo mbledhje partie e PS-së. “Seriozisht e keni që çdo mbledhje partie do ta ndiqni me kamera, duke ndenjtur këtu me orë të tëra? S’e kuptoj, ndoshta s’keni faj sepse i vetmi lajm për të ardhmen vjen nga PS. Të gjitha të tjerat janë o lajme shumë të vjetra, o burime të thara informacioni”, tha Rama.
Rama është shprehur se do të ketë një rivlerësim të deputetëve dhe ministrave çdo javë.
“Lajmi për të ardhmen vjen nga PS. Ne vazhdojmë punën, diskutojmë për gjendjen. Jemi në procesin e një ndëveprimi të ri me anëtarsinë.
Ka filluar të marrë kodet dixhitale. Pas pak do të dalë edhe kërkesa për vlerësim për ministrat që të jetë edhe përtej anëtarësisë. Çdo kush mund të hyjë për të bërë rivlerësim. Edhe ministrat do vlerësohen”.
Në mbledhje me shtabin keni kërkuar raporte për punën?
“Është proces që vazhdon dhe është goxha interesant dhe pozitiv”.
Emrat për kryesinë e re?
“Nuk flas sot deri të premten. Ka shumë kohë”.
Do jetë Ditmir Bushati?
“A faleminderit”.
Progres raporti?
“Nuk e kam lexuar, nesër pres komisionerin dhe sigurisht që do të jetë pasqyrë e ndryshme nga ajo që përpiqen që t’u vënë çdo ditë shqiptarëve ata që flasin në emër të Europës. Më vjen shumë mirë që edhe deklarata e BE lidhur me reformën zgjedhore ishte e kundërta me gjithçka që u predikua me re të zeza mbi Shqipërinë, duke hedhur helm që ta kapi kush ta kapi”.
