Miratimi në Kuvend i ligjit për hapjen e dosjeve, duket se ka alarmuar kreun e Partisë së Lirisë, Ilir Meta. Ish-presidenti ka sulmuar Ramën e Bashën. Ai kërcënoi kryeministrin Rama dhe Lulzim Bashën, të cilët i quajti “Musolini dhe dashnorja e tij Klareta”, duke thënë se do të përfundojnë si këta të dy. Musolini dhe Klareta u ekzekutuan gjatë Luftës së Dytë Botërore.
“Ligjet që bën djali i Kristaq Ramës dhe nipi i Kolekës do t’ia fus atje ku i shijojnë më shumë atij. Të gjitha ata që besojnë se do të mund të ekzekutojnë pluralizmin, Musolinit dhe Klaretës, këtë fat do të kenë. Ju e dini kush është Klareta e politikës shqiptare? Është ai i 17 majit.
Sa i përket dosjeve, ju e dini shumë që ajo çështje është e mbyllur. Parlamenti i Tiranës sa të mblidhet i ka gati komisionet hetimore. Dhe një komision është korrupsioni në Bashkinë e Tiranës sa i përket Autoritetit të Dosjeve. Sa i takon “Ramabashistëve”, vrimë miu nuk do të ketë ku të futen. Nuk bëhet fjalë vetëm për dinjitetin tim, por për dinjitetin e të gjithë qytetarëve shqiptarë. Piktori i sigurimit të Shtetit Edvin Kristaq Rama do të përgjigjet një më një”, tha Meta.
Kush është Clara Petacci, dashnorja e Benito Mussolini
Udhëheqësi fashist italian Benito Mussolini ishte i famshëm për të pasur shumë dashnore. Por pa dyshim më e rëndësishmja ishte e fundit, Clara Petacci, e cila u qëllua pranë tij më 28 prill 1945, vetëm 75 vjet më parë. Claretta ishte 29 vite më e re se ‘il Duce” dhe e kishte adhuruar që në adoleshencë.
Sipas historianit të Universitetit të Oksfordit, Richard J.B. Bosworth, i cili shkroi një biografi për të në vitin 2017, ata u takuan rastësisht. Ishte në një plazh jashtë Romës, në Ostia, në vitin 1932, kur Musolini kishte qenë tashmë udhëheqës suprem i Italisë për dhjetë vjet.
Claretta ishte 20 vjeç:
“Ajo vinte nga një familje romane borgjeze. Babai i saj ishte pjesë e ekipit mjekësor të Papa Piu XI dhe gjithashtu drejtonte një klinikë për klasën e lartë në Romë. Nëna e saj ishte shumë katolike dhe ishte e pazakontë ta shihje atë pa një rruzare në dorë”, thotë Bosworth.
Pavarësisht se Musolini ishte i martuar dhe se ishte shumë më i madh se vajza e tij, të dy prindërit inkurajuan lidhjen jashtëmartesore, tregon historiani.
