Në një komunikim në Facebook, kryeministri Rama ka folur për çështjen që na prek të gjithëve, pandemia. Teksa paralajmëron se fati i kësaj lufte vendoset nga sjellja e qytetarëve, distancimi social sesa nga sjellja e bluzave të bardha, ai anonçoi edhe masat kufizuese nga sot e tutje. Duke folur edhe në emër të ekspertëve, Rama tha se nuk do të lejojë asnjë lloj grumbullimi, duke vënë në rrezik jetën e njëri-tjetrit.
“Pasi kam folur me ekspertët dhe Ministren e Shëndetësisë, iu bëj me dije se nuk do të lejojmë më asnjë lloj grumbullimi, qoftë edhe politike. Liria e shprehjes s’ka qënë kurrë e diskutuar.
Grumbullimet nuk do të lejohen më. Policia do të bëjë detyrën pa bërë asnjë dallim. Kush merr pjesë në grumbullime, në grupime më të mëdha sesa numrat e lejuar, do të penalizohet. Bizneset që nuk zbatojnë protokollet, nuk do të tolerohen më. Përveç gjobave do të rrezikojnë edhe humbjen e lirisë. Qytetarët do të lëvizin lirisht, por do të penalizohen nëse kapen në shkelje në hapësirat publike. Të më ndjeni, por kështu jo më!”.
Kreu i qeverisë u shpreh se qytetarët duhet të vetëndërgjegjësohen, pasi nuk fuksionion me polic që tu ri në kokë. Ai nënvizoi se një mbyllje tjetër do ishte dërrmuese, por nëse shifrat do jenë alarmante, do rishikohet kjo alternativë.
“Është e kotë të përsëris sesa herë u kam thënë që COVID-i është armik i padukshëm dhe sa shumë u shtuan zërat tuaj se kjo është lojë dhe konspiracion. Atyre me fjalët dhe tubimet rrugëve. Kur vendosëm që të heqim masat dhe të lirojmë. Ishim të qartë se hapja do të sillte edhe rrezikun e harresës, por bëmë gjënë e duhur në kohën e duhur, dhe do ta bënim sërish.
Unë isha dhe jam dakord me shumë kënd që kërkonte ditë pas dite kthimin në normalitet, duke thënë se shëndeti i ekonomisë familjare nuk mund të dobësohej përtej një pike të caktuar.
Kemi zgjedhur rrugën e këshillimit dhe jo të ndëshkimit të bizneseve, për t’ia lehtësuar hallin gjithkujt. E kemi ditur dhe thënë se numrat do të rriteshin, gjëra më normale, po u ndodh të gjitha vendeve, ashtu sikundër kam kërkuar të mirëkuptoni nevojën për solidaritet të ri për rregullat.
Ekonomia bie dhe ngrihet, të vdekurit nuk ringjallen. Një mbyllje tjetër do të ishte dërrmuese për Shqipërinë, për çdo familje dhe burimet e energjisë së rimëkëmbjes. Nëse do të vijojmë kështu, fatkeqësisht do të na duhet të rimbyllemi dhe të përballojmë me shumëfish sekëlldinë që provuam kur u mbyllëm dhe pasojat e plagëve që morëm nga mbyllja e parë. As në mend nuk dua ta çoj këtë, pasi kam bindjen se ende e kemi vetë në dorë. Numrat janë shqetësues, por në kontroll, testimet janë rritur”.
