Gjatë konferencës së përjavshme me gazetarët, kreu i PD-së, Sali Berisha, hodhi akuza se Lulzim Basha ishte marrë peng nga Edi Rama dhe se ishte ai që firmosi për largimin e tij nga kjo forcë politike.
Berisha po ashtu tha se nuk donte të bënte profetin, por i kishte thënë Bashës se kudo që të shkonte, do të ndiqej nga dosjet e tij. Kreu i PD-së thekson se përgjegjësia në këtë rast nuk është e Partisë Demokratike, por është individuale e Lulzim Bashës, për të cilën thotë se do të ngrihet një komision auditimi për të bërë transparencë, si dhe në emër të PD-së kërkon hapjen e një hetimi të plotë për këtë çështje.
“Ai ishte peng i Edi Ramës, së dyti i kam deklaruar më herët se si ai firmosi për të larguar Berishën nga PD-ja dhe morri pjesë në skenarin e shpalljes sime “non-grata” për qëllimet e tij. Paska qenë keqësisht i kapur dhe mendoi se në atë mënyrë do shpëtonte lëkurën e tij.
Por unë i thashë, e vërteta vonon por nuk harron! I kisha deklaruar atij: Lulzim, kudo që të shkosh, para teje shkojnë dosjet e tua. Nuk dua të bëj profetin, por këto i’a kam thënë.
Këto janë akte që nuk janë kompetencë e Bashës apo e Ramës, por të sigurisë madhore kombëtare, tjetër punë se i ka në dorë Rama dhe bën si do. Bëhet agresion i madh ndaj vendit, dhe nuk mblidhet as Këshilli i Mbrojtjes Kombëtare, as Komiteti. Ai çfarëdo gënjen e mashtron, sillet sikur është nën çifligun e tij në Surrel”.