Aneta Plaku është nëna e katër fëmijëve dhe prej 4 vitesh ajo po mundohet që të rrisë të vegjëlit e saj e vetme. Kryefamiljari ka ndërruar jetë si pasojë e sëmundjes së diabetit, pas neglizhencës dhe pamundësisë për të shkuar dhe për të bërë kontrollet mjekësore.
“Motrat e vëllai nuk kanë njeri tjetër përveç meje, edhe mami. Që pasi babai ndërroi jetë, më ka mbetur mua e mamit në supe të kujdesemi për ata. Sepse fëmijët jetimë kështu e kanë,” shprehet Oksana vajza e madhe, e cila me dëshpërim thotë se do të ndërpresë edhe shkollën për të punuar.
Pas humbjes së bashkëshortit, Aneta u gjend e vetme në mes të katër rrugëve, me 3 vajza të mitura dhe 3 muajshe shtatzënë. Pas shumë mosmarrëveshjeve dhe konflikteve me të afërmit, asaj i duhej të largohej nga Dibra dhe u transferua në Kavajë së bashku me fëmijët.
Shtëpinë ia ka paguar një donator deri në përfundim të këtij viti. E në janar, Aneta druhet se do të mbesë sërish në rrugë, pasi nuk ka asnjë të ardhur për të paguar qiranë.
Ajo tregon se ka kërkuar punë, por e ka pasur shumë të vështirë, pasi gjithmonë ia kanë mbyllur derën. Të vetmet të ardhura janë ndihma ekonomike dhe pensioni i jetimit, të cilat shpesh nuk mjaftojnë edhe për t’ia dalë mbanë me ushqimet.
Pasi u njoh me rastin, “Fundjavë Ndryshe” i është gjendur pranë për çdo nevojë të tyren. Ndërsa bën thirrjen për ndihmë, në mënyrë që të sigurojmë një strehë të re për Aneta Plakun dhe 4 fëmijët e saj të mitur.
Bamirësia nuk të varfëron!
