Gazetarja e njohur investigative, Klodiana Lala deklaroi se SPAK do të kryejë të tjera arrestime, ku sipas informacioneve të saj, do të ketë prangosje në sistemin shëndetësor.
Deklarata e Lalës u bë mbrëmjen e sotme në emisionin ”Çim Peka Live” në Syri Tv. Duke iu referuar arrestimit të ish-zv.ministres Rovena Voda, Lala u shpreh e habitur se pse SPAK u vonua për çështjen e saj.
Klodiana Lala: ”Unë mendoj se SPAK po merret me çështje që duken më shumë për të treguar se po bëjnë diçka, por nuk është e mjaftueshme. SPAK duhet që ta ngrejë më lart stekën. Duhet të nisë puna me tenderat multi-milionëshe. Rastet e arrestimeve nga SPAK tregojnë se korrupsioni në Shqipëri është një fenomen. Është njësoj sikur puna e kanabisit që ishte fenomen, por thuhej e kundërta nga ana e qeverisë. Mendoj se do ketë arrestime edhe më tej, por më shumë janë për t’ju hedhur hi syve. Pashë se Voda ishte arrestuar për dhënien e 2 mijë eurove, por prisja arrestim për ndonjë tender milionësh. Gjithsesi nuk e kuptoj se përse SPAK u vonua një vit për arrestimin e Vodës. Pritet të kenë arrestime të tjera dhe faktet më çojnë se do të kemi të bëjmë në fushën e shëndetësisë.”
