Kryeministri Edi Rama, i ka bërë thirrje disa herë kryetarit të Partisë Demokratike, Lulzim Basha për bashkëpunim, pas zgjedhjeve të 25 prillit.
Por, kreu i qeverisë kishte një kusht, ndarjen e Bashës nga Presidenti Ilir Meta dhe ish-kryeministri Sali Berisha.
Edhe pse e ka ftuar disa herë, Basha ka deklaruar të njëjtën gjë, se nuk do të ketë kurrë bashkëqeverisje me Ramën.
Këtë fakt, kryedemokrati e konfirmoi sërish në emisionin ”Frontline”, teksa u pyet nëse do të ketë një marrëveshje si ajo e 17 majit në vitin 2017.
Pjesë nga biseda
Si e komentoi ftesën e Ramës për t’u bashkuar, me kushtin që të mos jetë Meta e Berisha pas jush?
Lulzim Basha: ”Pas 8 vitesh premtime të pambajtura, kjo kthesë e beftë e Ramës nuk është gjë tjetër veçse pranimi i humbjes së tij. Edi Rama nuk do të jetë kurrë pjesë e bashkëqeverisjes sonë. Ne do të qeverisim vendin.”
A po kërkon Rama të bëjë diversion mes PD e LSI me këto deklarata?
Lulzim Basha: ”E gjithë vëmendja jon është te shqiptarët, deklaratat e tij tregojnë se e ka humbur toruan. Ne e dimë çfarë rrënojash po lë pas Edi Rama. Na presin punë të mëdha, që do t’i kryejmë me bashkimin më të madh të shqiptarëve.”
Nuk ka 17 maj të dytë?
Lulzim Basha: ”25 prilli është dita e fitores së të gjithë shqiptarëve, dita kur ata do të marrin fatin e tyre në dorë. Thirrja ime është që asnjë të mos rri në shtëpi.”
