Kryeministri Rama ka mbledhur në Kryeministri ministrat, të cilët i paralajmëroi se çdo rast abuzimi me tenderat do shkojë në SPAK. Ai e cilësoi paketën e re ligjore të prokurimit publik, një hap me rëndësi për rritjen e eficencës dhe transparencës së sistemit të prokurimeve në vend. Në prezantimin e paketës së re ligjore të prokurimeve publike, kreu i qeverisë citoi se ky sistem duhet rrethuar nga një mur i lartë. Ai ka paralajmëruar se çdo shkelje dhe abuzim me tenderat, do të shkojë në SPAK nga godina e Kryeministrisë.
“Nga të dhënat e administruara dhe analizuara nga të gjithë institucionet që lidhen me ministritë dhe agjencitë, kanë asistuar 936 procedura të publikuara nga këto institucione, ndër to 70% e procedurave kanë rezultuar problematike në hartimin e kritereve dhe për këtë arsye institucioneve përkatëse janë dërguar rekomandime nga Agjencia e Prokurimet. 20% e institucioneve nuk kanë reaguar, ose nuk kanë reflektuar ndaj rekomandimeve.
Po të shohim përceptimin publik për tenderat, pamja është madhështore për nga negativiteti i saj. Ajo që bie në sy është niveli i ulët i kuptimit të vetë procesit. Paketa ligjore synon që të mos i hahet haku askujt në këtë vend. Është një proces i nderlikuar, për të cilin edhe BE vazhdon të kërkojë rrugë dhe mjete ligjore për ta përsosur.
Por është e mundur që në një kohë të shkurtër, ky shtet të kalojë në një nivel tjetër në fushën e prokurorimeve. Institucionet duhet të funksionojnë si hallka, jo si bajrak. Çdo rast abuziv do shkojë në SPAK, dhe do shkojë në SPAK nga kjo godinë këtu”, deklaroi Rama.
