Partia Demokratike deklaroi mbrëmjen e sotme se banorët e Unazës së Re që protestojnë prej muajsh janë sulmuar sot nga një automjet që ka hyrë mes tyre ndërsa protestonin. Nuk dihet se kush e drejtonte makinën por sipas PD policia nuk ka ndërhyrë për të ndaluar shoferin që rrezikoi jetën e banorëve.
“Një person me automjet ka sulmuar banorët që protestonin në Unazën e Re. Mjeti që drejtohej nga një shtetas i paidentifikuar ende hyri mes turmës ku kishte më së shumti gra dhe fëmijë. Momenti ka qenë tmerrues dhe në video dëgjohen ulërimat e fëmijëve të traumatizuar. Policia e cila ndodhej shumë pranë vendit të ngjarjes nuk ka ndërhyrë dhe ka qëndruar indiferente ndaj këtij sulmi që mund të kishte qenë me pasoja fatale për jetën e protestuesve, grave dhe fëmijëve të tyre”, deklaron PD.
Një banore bëri thirrje për shoferët duke i paralajmëruar: “Në rast se tentojnë të shtypin banorët e “Unazës së Re” do t’iu vejmë flakën, ky është një paralajmërim. Do iu djegim me benzinë”, shprehet qytetarja e revoltuar pas incidentit.
Momentin e gjeni në videon më poshtë.
