Ishte ora 22:00, kur 40-vjeçari Hekuran Billa po afrohej në hyrjen kryesore të një qendre tregtare, nga ku do të dilte e motra, që sapo kishte mbyllur dyqanin e këpucëve që kishte në pronësi. Një automjet i parkuar dysh, i ka bllokuar rrugën dhe autorët kanë shfrytëzuar rastin për t’i dalë në krah makinës së tij, një BMV X6. Pavarësisht tentativave të tij, atentatorët e kanë goditur me një armë automatik MP5, të përshtatur me silenciator. Pas vrasjes, makina e autorëve u gjet e djegur në Prezë të Vogël, dhe brenda saj dhe arma e krimit e dëmtuar nga zjarri.
Tashmë janë hedhur në dritë disa detaje të reja. Dosja.al ka zbardhur detaje nga kontrata e punës, që do t’i siguronte Hekuran Billës riintegrimin në shoqëri, gjatë kohës që pas daljes nga qelia, do të ishte në liri me kusht. Me të njëjtën skemë si në rastin e Endrit Dokles, dhe i prirë nga e njëjta gjyqtare, Enkeljeda Hoxha, Billa u punësua si postier në studio ligjore.
Bëhet fjalë për zyrën e avokatisë “Duka”, në pronësi të Alma Dukës, e cila mori përsipër rehabilitimin e Billës pas daljes nga burgu dhe riintegrimin e tij në shoqëri.
Me paratë që do të merrte si poster, bazuar në deklaratat e thëna nga avokati i 40-vjeçarit të ndjerë, Hekuran Billa do të blinte ilaçe dhe do të mund të kujdesej për prindërit e tij të sëmurë.
Billa figuronte i punësuar në studion ligjore, në rrugën ‘Haxhi Hysen Dalliu’.
Burime të policisë kanë bërë me dije më herët se janë shoqëruar 22 persona, që jo vetëm kanë parë krimin, por edhe dyshohet të kenë fiksuar autorët e krimit. Hetimet po kryhen nga komisariati numër 2., që ka marrë në pyetje një numër të madh personash, dëshmitarë dhe të dyshuar.
