Këshilli Kombëtar i Partisë Demokratike ka votuar unanimisht pro djegies së mandateve të deputetëve të opozitës.
Dhjetëra qytetarë janë mbledhur jashtë selisë blu, për të pritur vendimin e marrë nga demokratët. Pas votimit, Basha ka dalë para qytetarëve, ku tha se ky është një vendim i vështirë, por i vendosur nga sovrani në protestën e fundit.
“Përmes këtij vendimi të vështirë dhe të paprecedentë, ne synojmë të çojmë deri në fund betejën për vlerat evropiane, do e hapim derën që na çon drejt Evropës, ajo derë është motivi ynë. Do hapet vetëm kur vendi të ketë zgjedhje të lira e të ndershme!”, tha ndër të tjera Basha, teksa ftoi qytetarët që të marrin pjesë në protestën e nesërme.
Fjala e Bashës:
Në këtë 20 shkurt, 28 vite pas rrëzimit të simbolit të diktaturës më të egër që ka përjetuar Evropa, shqiptarët do të kenë në krahët e tyre PD-n,ë njerëzit tanë do jenë në krah të qytetarëve si qytetarë të thjeshtë për të vendosur që kurrë më në Shqipëri të mos vendoset një regjim tjetër diktatorial. Kurrë më të mos shkelen të drejtat e njeriut, që vendit t’i rikthehen zgjedhjet e ndershme.
Pasi kemi shteruar çdo mundësi tjetër për t’i kthyer legjitimitetin institucioneve, por pas urdhrit të sovranit që ushtoi fuqishëm në protestën më të madhe, s’kemi asnjë rrugë tjetër dhe zgjedhim t’i bindemi urdhrit të tij. Përmes këtij vendimi të vështirë dhe të paprecedentë, ne synojmë të çojmë deri në fund betejën për vlerat evropiane, do e hapim derën që na çon drejt Evropës, ajo derë është motivi ynë. Do hapet vetëm kur vendi të ketë zgjedhje të lira e të ndershme!/ Tirana Today
