Endrit Thaçi, djali i presidentit të Kosovës, Hashim Thaçi, iu ka bërë thirrje qytetarëve që të mblidhen sonte dhe të presin në pikën kufitare në Morinë kreun e shtetit.
Ai ka shpërndarë në Instagram një foto, me anë të së cilës fton qytetarët në orën 19:30 për t’i uruar mirëseardhje Presidentit Thaçi.
“Mirë se vjen, president! Të gjithë në pritje të heroit të luftës dhe paqes. Pika kufitare në Morinë. E premte, 17 korrik 2020, ora 19:30. Eja edhe ti! Merre flamurin me veti. Vendose maskën dhe mbaje distancën”, shkruan ai në postimin e tij.
Presidenti i Kosovës, Hashim Thaçi, pritet të kthehet sot në Kosovë pas 4 ditësh intervistimi nga Dhomat e Specializuara në Hagë.
Qeveria e Kosovës ka ndaluar tubimet me mbi 50 persona me qëllim të parandalimit të përhapjes së koronavirusit. Nuk dihet ende nëse kjo iniciativë do të marrë përkrahjen e qytetarëve.
