Nata e ndërrimit të viteve nuk ka kaluar pa lënë “gjurmë” dhe incidente të vogla gjatë momenteve festive nga qytetarët. Nevojat e qytetarëve për ndihmë mjekësore ka qenë prezente, ndërsa mjekët janë përballur me raste më të thjeshta se vitet e kaluara. Sakaq, raportohet se më shumë se 700 qytetarë kanë kërkuar ndihmë mjekësore, gjatë natës së ndërrimit të vitit.
Qendrat spitalore në mbarë vendin kanë punuar 24 orë pa ndërprerje duke përballuar një fluks, i cili ka rezultuar pozitiv dhe pa pasoja në jetë njerëzish. Ndihma mjekësore në terren ishte në gatishmëri të plotë me 127 autoambulanca.
Në kryeqytet ishin 5 pika dhe 8 ekipe urgjence në terren, pranë sheshit Nënë Tereza dhe sheshit Skënderbej, në Kombinat, rrugën e Kavajës, në ish-Urgjencën e Tiranës si dhe në Qendrën Kombëtare të Urgjencës, afër Spitalit të Traumës
Në kryeqytet autoambulancat që ishin në gatishmëri kanë kryer 142 ndërhyrje duke dhënë ndihmë të menjëhershme. Nga fushikzjarret janë dëmtuar 17 persona, kurse nuk kanë munguar edhe rastet e ndërhyrjes së mjekëve në raste ku qytetarët kanë abuzuar sa i përket konsumit të alkoolit.
