Deputetja Rudina Hajdari ka deklaruar se sikur mos të mjaftonte pandemia, qytetarëve iu shtua stresi me prishjen e Teatrit. Duke shigjetuar Ramën e Veliajn, ajo thotë se ata duhet të mbajnë përgjegjësinë lidhur me këtë akt të rëndë. Mjaft e indinjuar për çfarë ka ndodhur, ajo e ka cilësuar politikën shqiptare si një teatër me trupë aktorësh, ku ditën bëjnë sikur zihen e natën jetojnë të lumtur në resortet e tyre luksoze. Hajdari, duke qëndruar në të njëjtën linjë, deklaroi se prej 30 vitesh kemi të njëjtën aktorë në politikën shqipatare dhe se çdo gjë e bëjnë në kurriz të popullit.
“Sikur të mos mjaftonte stresi që po kalojnë qytetarët si pasojë e COVID-19, ku prej dy muajsh janë të izoluar në shtëpi, kanë mbyllur bizneset, kanë humbur të ardhurat e janë në pasiguri të plotë për të ardhmen. Sot qeveria vendosi të shtojë stresin, duke shembur me dhunë në shkelje të disa ligjeve godinën e Teatrit Kombëtar. Së pari, shkelja është në disa dimensone, ku së pari u shkel ligji për pushtetin vendor se vendimi s’kishte hyrë në fuqi dhe është marrë në kundërshtim me procedurat që janë përcaktuar për vendimarrje online gjatë periudhës së pandemisë. Së dyti, tjetërsimi i një monumenti kulture të cilësuar e tillë nga ‘Europa Nostra’, e cila e shpalli si një nga 7 godinat që duheshin ruajtur, por Rama dhe Veliaj nuk pyetën. Ata duhet të mbajnë përgjegjësi një ditë. Kemi edhe korin e atyre që marrin betejën e qytetarëve”, ka thënë Hajdari.
Në një video-mesazh, Hajdari shprehet se teatri është shembur pas një marrëveshje mes mazhorancës dhe opozitës jashtëparlamentare.
“Ata opozitën e bëjnë për të përfituar edhe kur janë në pushtet. Duhet ta kishim ruajtur që mos ta harrojmë se si ka qenë arti shqiptar. Gjermania ka shndërruar në muze edhe ish-kampet e përqendrimit, të cilat janë simboli i më të keqes që ka parë e gjithë bota, e megjithatë janë ruajtur. Sot kush ka sy, ka parë qartë një Teatër tjetër që është vënë në skenë për 30 vite nga të njëjtët aktorë. Klasa jonë politike teatrale, që ditën bëjnë sikur zihen e natën bashkohen në resortet e tyre luksoze ku jetojnë të lumtur së bashku. Mos kini asnjë iluzion. Teatri u prish në marrëveshje të plotë mes tyre”, është shprehur Hajdari.
