Teksa punonjësit e rafinerisë së naftës në Ballsh kanë hyrë në ditën e 12-të të grevës së urisë, kreu i sindikatës së naftëtarëve, Sokol Dautaj është dërguar me urgjencë në spitalin e qytetit.
Mësohet se ai ka probleme të rënda shëndetësore, pasi ka patur luhatje të tensionit dhe ka pësuar dy goditje në zemër.
Ndërkohë, edhe 9 grevistë të tjerë, paraqiten në gjendje të vështirë shëndetësore.
Ditën e djeshme, naftëtarët u kyçën brenda ambienteve ku po zhvillojnë grevën e urisë, dhe nuk pranojnë hyrjen e gazetarëve apo mjekëve.
Ata thanë se do të vetëflijohen për hir të fëmijëve, dhe do dalin prej aty vetëm me barela.
Janë rreth 900 naftëtarë të cilët prej dy vitesh kërkojnë marrjen e pagave të prapambetura dhe kërkojnë rinisjen e punës në uzinë.
