Kryeministri Edi Rama ka zhvilluar një konferencë të përbashkët me ministrin e Jashtëm italian Luigi Di Maio, i cili ndodhet në një vizitë zyrtare në vendin tonë.
Gjatë fjalës së tij në konferencë, Rama falenderoi edhe njëherë shtetin italian për ndihmat e ofruara në përballimin e situatës pas tërmetit të 26 nëntorit.
“Dua ta përsëris edhe një herë publikisht, shprehjen e mirënjohjes më të thellë ndaj Italisë, qeverisë dhe trupave të kërkim shpëtimit dhe të emergjencave civile italiane, që ishin të parat që zbarkuan në Shqipëri dhe vunë jetën e tyre në rrezik për të shpëtuar jetë njerëzish. Marrëdhënia me Italinë është e shkëlqyer më vjen mirë që edhe me qeverinë e re kemi një marrëdhënie të shkëlqyer”, tha ai.
Sa i përket takimit të tij me ministrin Di Maio, kreu i qeverisë tregoi se kanë folur mbi reformën në drejtësi. Gjithashtu ai shprehet se kanë folur edhe mbi legjislacionin e ri kundër KÇK.
Rama falenderon sërish Di Maion për ndihmën që Italia ka dhënë në marrjen e kryesisë së OSBE nga Shqipëria.
“Ka shumë e shumë gjëra për të cilat Italia dhe qeveria e Italisë meriton të falenderohet, por pa dashur të zgjatem, dua të them se në radhë të parë e falenderoj pa masë ministrin për impenjimin konstant për të shtyrë procesin e integrimit evropian të Ballkanit Perëndimor e vecanërisht të Shqipërisë. Diskutuam për aspekte të partneritetit strategjik. Italia ka qenë e mbetet parteneri ynë kryesor, vendi që nuk është kursyer asnjëherë në transformimin e Shqipërisë nga një diktaturë në demokraci funksionale.
Kemi diskutuar edhe legjislacionin e ri kundër KÇK, njësinë kundër korrupsionit. Ministri italian më ka konfirmuar gatishmërinë e Italisë për të na mbështetur me njerëz në terren. Duan që ta thellojmë këtë partneritet strategjik të afrohemi në të gjitha fushat e interesit të përbashkët. E falenderoj ministrin edhe për mbështetjen që Italia ka dhënë në marrjen e kryesisë së OSBE nga Shqipëria, e siguroj që do bëjmë më të mirën, e do jetë vlerë e shtuar në bashkëpunimin tonë”, deklaroi ai.
