Të pakta janë rrugët në kryeqytet të cilat nuk janë të “pushtuara” nga tregtarët ambulantë. Tirana Today bëri një vëzhgim në disa prej rrugëve në zonën e Laprakës. Që nga frutat e perimet, cigaret dhe deri tek rrobat e përdorura. Disa të vendosur në lulishte e të tjerë në trotuaret e ngushta. Ata janë aty, edhe pse policia bashkiake prej kohësh ka nisur aksionin e largimit të tyre nga trotuaret, tregtarët thonë për Tirana Today se rikthehen përsëri.
“Unë e di që jam gabim, por çfarë të bëj, me çfarë të ushqehem.”
Ndërkohë që Veliaj lajmëroi largimin e tregtarëve nga trotuaret, për të shkuar në tregje, ata shprehen se atje nuk ka vende.
“Kam shkuar në treg, edhe aty tek Kupola e nuk kam gjetur vend. Të gjitha janë të zëna, e çfarë të bëjmë ne, ku të shkojmë. Ne i lutemi policisë duke i thënë se jemi pensionistë, me shtëpi me qira, nuk kemi mundësi. Ndaj të na lënë një vend të caktuar të paguajmë biletën, këto vijnë na i marrin e na vendosin gjoba.”
Ndërkohë, një tjetër qytetare shprehet për Tirana Today se policët i kanë kërkuar lekë, për ta lejuar të qëndrojë në rrugë.
“Unë vetë kam shkuar dhe i kam pyetur policët se përse më kanë piketuar vetëm mua. Dhe ai ma kthen që unë nuk di të bashkëpunoj me policinë. Bashkëpunim do të thotë që nuk i jap ndonjë lekë ose gjë tjetër. Unë kam pasur raste që më kanë vendosur gjobë në të njëjtën orë. Më kanë marrë edhe mallin në makinë, por edhe mi kanë vendosur gjobë makinës.”
Të gjendur mes nevojës për të fituar disa të ardhura, presionit nga policia për të liruar trotuaret dhe nervozizmit të shumë kalimtarëve të cilët e kanë të vështirë të kalojnë; tregtarët ambulantë kërkojnë ndihmë. Ata shprehen për Tirana Today se nuk duan të punojnë në këto kushte apo të përballen çdo ditë me poshtërimin që i vjen nga policia. Por, bashkia duhet të krijojë kushtet e favorshme për të përfituar të gjithë. Tirana Today
