Raundi i tretë për zgjedhjen e Presidentit, u ezaurua pa një kandidat. Asnjë propozim nuk u dorëzua në Kryesinë e Kuvendit brenda afatit. Duket se Presidenti do të zgjidhet vetëm me votat e socialistëve. Kreu i Grupit Parlamentar të PS-së, Taulant Balla, deklaroi se në dy raundet e fundit për zgjedhjen e Presidentit do të propozojnë emrat e tyre. Ai u shpreh se opozita nuk pranoi të marrë përgjegjësinë e saj, ndërsa shtoi se janë të gatshëm të dialogojnë me këdo.
“E para, siç e patë, ne i qëndruam angazhimit tonë për të pritur propozim konkret nga opozita. Raundi i dytë dhe i tretë, ne nuk do të kishim një propozim tonin me besimin se opozita do të merrte përgjegjësitë për të propozuar kandidatura në proces.
Ne nuk do ta lëmë vendin pa President, dhe do të propozojmë duke ndjekur parimet e një procesi ku dëshira jonë është të dialogojmë me këdo. Mos të harrojmë që në raundet e fundit, Kushtetuta ka përcaktuar një mekanizëm zhbllokues ku askush nuk mund të marrë peng zgjedhjen e Presidentit”, u shpreh Balla.
Ai tha se procesi për zgjedhjen e Presidentit të vendit po shkon drejt fundit, duke paralajmëruar se emri i Kreut të ri të Shtetit mund të mësohet brenda afateve që përcakton raundi i katërt.
Sipas Ballës, “kemi ardhur në momentin e përmbylljes së këtij procesi”, por kishte dhe një mesazh për opozitën, kur tha “nëse opozita ka dëshiruar prej fillimit të ketë President që ta zgjedhë e vetme, mendoj që kjo nuk i bën nder askujt”.
“E para në raundin e 4, PS do propozojnë një kandidat apo kandidate në varësi të një procesi që ne jemi duke e vijuar që prej datës 28 mars.
Një forcë politike serioze, bën dhe një proces paraprak përzgjedhës. Përgjatë këtij ne kemi identifikuar dhe vijojmë të identifikojmë kandidatura potenciale që përmbushin disa prej pritshmërive që kanë qytetarët. Ne duam që Presidenti apo Presidentja në 5 vitet e ardhshme të jetë autoritet moral. Të mos jetë Presidenti i PS, por i gjithë shqiptarëve.
Kini pak durim e në ditët në vijim do jemi në komunikim dhe më të shpeshtë për gjithë zhvillimet. Ne brenda forcës tonë kemi rregulla që do i respektojmë, do bëjmë diskutim të gjerë e thelluar në Kryesi, më pas në grupin parlamentar prej ku do merret dhe mbështetja si e kërkon Kushtetuta me të paktën 20 firma mbështetëse. Në këtë rast, PS ka 74 mandate dhe ajo që është me rëndësi është që ky proces po shkon drejt përfundimit”, tha Balla për hapat që do të ndiqen nga sot në PS për emrin e ri të Kreut të Shtetit.
