Një mjet është përfshirë nga flakët gjatë natës në Elbasan. I referohemi makinës tip “Porsche” i biznesmenit Elis Bahushi.
Mjeti në fjalë është përfshirë nga flakët, teksa ka qenë e parkuar në lagjen ’28 nëntori’ në Elbasan. Dyshohet se zjarrvënia ka qenë e qëllimshme. Policia ndodhet në vendin e ngjarjes, dhe ka nisur hetimet.
Pronari i mjetit luksoz, Elis Bahushi, rezulton të jetë një emër i njohur për policinë. Ai është arrestuar më 22 tetor të vitit 2018 për ngritjen e laboratorit të përpunimit të heroinës në Brenog të Hasit.
Nga përgjimet telefonike, rezultoi se biznesmeni ishte i lidhur me grupin Avdylaj nga Shijaku. Nga hetimet dyshohet se Bahushi ka pasur rolin e transportuesit të lëndës narkotike dhe përbërësve të saj nga Turqia drejt vendit tonë.
Më 18 gusht, operacioni ‘Forca e Ligjit’ i kërkoi Bahushit deklarimin e pasurisë, pasi ai ka qenë i dënuar më herët për veprat penale “Prodhimi dhe shitja e narkotikëve” dhe “Pastrimi i produkteve të veprës penale”.
