Makina e një efektivi të policisë në Elbasan është djegur. Ngjarja ka ndodhur në mesnatë, në lagjen “28 Nëntori”. Mjeti tip “Volkswagen” është në pronësi të efektivit Edvin Gjyli, i cili prej disa muajsh është rikthyer në punë, pas një pezullimi me vendim gjykate. Sipas njoftimit të policisë, makina që i përket efektivit Edvin Gjyli ka qenë e parkuar në momentin kur është përfshirë nga flakët.
“Në lagjen “28 Nëntori”, Elbasan, ka rënë zjarr në mjetin tip “Volkswagen”, në pronësi të shtetasit E.Gj., ( punonjës i Policisë në Komisariatin Elbasan), i cili ishte i parkuar dhe si pasojë mjeti është djegur pjesërisht. Grupi hetimor ndodhet në vendngjarje, dhe po punon për zbardhjen e shkakut të zjarrit dhe dokumentimin e ngjarjes”, njofton policia.
Nuk raportohet për të lënduar, por vetëm për dëme materiale. Policia po heton për zbardhjen e plotë të rrethanave të incidentit, dhe kapjen e autorëve.
Kush është Edvin Gjyli?
Edvin Gjyli, specialisti i Krimeve në Policinë e Elbasanit, është një emër i përfshirë në çështje të bujshme në Policinë e Elbasanit. Ai ishte një nga katër emrat e punonjësve të policisë, të cilët u pezulluan nga detyra për shkak se dyshoheshin se nxorën sekretin hetimor e operacionale, lidhur me një superaksion që u zhvillua nga RENEA e FNSH me 1 korrik, në aksin rrugor Elbasan-Papërr. Gjatë të cilit u zbulua një arsenal armësh të sofistikuara. Armatimet në fjalë i përkisnin prodhimit francez dhe belg, të cilët përdoren nga ushtritë e vendeve të NATO-s. Kjo bazë armatimi besohet se i përket një grupi kriminal të fuqishëm në Elbasan.
Por në një kohë ku Gjykata e Apelit Durrës vendosi të rrëzojë masën e pezullimit nga detyra, dhe të kthejë në krye të Komisariatit të Cërrikut, Bilal Semanaj dhe vartësin e tij, shefin e krimeve Albion Xhihani, për Edvin Gjyli dhe Eduard Hasani, masa e pezullimit është lënë në fuqi. Ndërkohë në njoftimin e sotëm të policisë thuhet se Gjyli është punonjës i Policisë së Elbasanit, dhe ende nuk dihet si është rikonfirmuar në detyrë.
Gjyli dhe Hasani janë dërguar me urdhër të shefit të Krimeve në Drejtorinë e Policisë në Elbasan, në fshatin Broshkë, për të kryer veprime hetimore, për arsenalin e armëve të zbuluara. Por më pas kanë bërë edhe foto që më pas u shpërndanë në media.
