Kryeministri i Kosovës, Avdullah Hoti, ka thënë se procesi i dialogut me Serbinë nuk do të udhëhiqet nga presidenti i vendit, Hashim Thaçi.
“Kemi ndërtuar një qasje të tillë, që dialogu që do të udhëheq unë si kryeministër i vendit, do të bazohet mbi Kushtetutën. Dialogun me Serbinë do ta udhëheq unë, pasi kështu e thotë Kushtetuta; këtë rol nuk mund ta marrë Thaçi. Unë jam në krye të dialogut, ndërsa presidenti e ka rolin e vet kushtetues si kreu i shtetit”, ka thënë Hoti në ‘Rubikon’.
“Nuk dialogojmë për integritetin territorial të Kosovës; nuk dialogojmë për karakterin unitar të shtetit të Kosovës”, është shprehur Hoti. Duke aluduar që marrëveshja e cila do të arrihet, duhet të jetë në përputhje me frymën e Kushtetutës së Kosovës.
Kryeministri Hoti ka përmendur edhe një ftesë që i ka dërguar Lëvizjes Vetëvendosje, për të diskutuar rreth dialogut.
“Nuk kam marrë asnjë lloj përgjigje nga VV. I kam ftuar si kryeministër i vendit, që t’ua prezantoj qasjen tonë si Qeveri për këtë proces. I jam adresuar Kurtit”.
