Bashkimi Evropian nuk ka pranuar që të komentojë njoftimin se më 27 Qershor, Kosova dhe Serbia do të takohen në Shtëpinë e Bardhë, me ndërmjetësimin e të dërguarit të Shteteve të Bashkuara për dialogun, Richard Grenell.
“Nuk i komentojmë aktivitetet e të tjerëve”, tha zëdhënësja e zyrës së BE në Kosovës, Dinka Zhival, ndërsa bëri të ditur së përfaqësuesi i posaçëm i BE-së për dialogun, Miroslav Lajçak, viziton sot Prishtinën.
Siç thuhet, në fokus të vizitës do të jenë modalitetet e bisedimeve me Serbinë, si dhe do të propozohen data për rinisjen e procesit.
Zëdhënësja e BE-së kujtoi se dialogu i ndërmjetësuar nga Brukseli ka sjellë rezultate reale për njerëzit në Kosovë, shkruan “A2”.
Lajçak duhej të mbërrinte të hënën në Prishtinë, por fluturimi nga Zvicra drejt Shqipërisë, nga ku më pas do të shkonte në Kosovë, u anulua.
