Paraditen e sotme, në Gjykatën e Vlorës është mbajtur seanca për tre vëllezërit Myslymi, të cilët u arrestuan dje pasi akuzohen se kanë sulmuar fizikisht dhe verbalisht gjyqtarin Arqile Basho 63- vjeç, gjatë një seance gjyqësore. Gjykata ka dhënë masën e sigurisë për tre vëllezërit Myslimi që dhunuan gjyqtarin në Vlorë, pas një vendimi për çështje pronësie. Fatosh Myslimit iu dha masa e sigurisë “arrest me burg”, ndërsa dy të tjerëve, Elmazit dhe Myslimit iu dha masa e sigurisë “arrest shtëpie”.
Pasi ka mbaruar masa e arrestit për tre vëllezërit Myslimi, dalja e tyre nga ambientet e Gjykatës ka shkaktuar shumë tension.
Dalja e tyre nga ambientet e gjykatës është shoqëruar me ulërima dhe ndërhyrje të familjarëve, të cilët tentuan të hapnin edhe derën e makinës së policisë. Ata thanë se në vend të të arrestuarve, duhej të ishte gjyqtari.
“O plehra, lërini. Çfarë kanë bërë ore?! Merrni gjyqtarin o ndyrësira, e ka gjyqtari vendin aty”, dëgjohet të thonë familjarët.
Sipas familjarëve, në burg duhet të ishin administratorët e pallatit të ndërtuar në pronën e tyre, noterët dhe Gjykata. Bëhet fjalë për apartamente në pallatin e ngritur nga dy firma ndërtimi në tokën e Myslymëve, të cilat sipas familjarëve, janë shitur dy herë.
Ngjarja ndodhi në ambientet e Gjykatës së Vlorës, ku pas një vendimi të dhënë, gjyqtari Arqile Basho 63-vjeç është dhunuar nga të paditurit.
Tre vëllezërit kanë akuzuar gjykatësin, duke pretenduar se po i grabit pronën dhe se sipas tyre, vendimi i gjykatësit është dhënë kundër tyre.
Vajza e një prej vëllezërve, Greiselda Myslymi, ish-kandidate e LSI-së për Vlorën, tha se gjatë gjykimit ka pasur shtrembërim të fakteve, pasi është ngatërruar me qëllim personi që duhet të qëndronte në burg. Sipas saj, është lënë në burg Fatosh Myslymi, dhe jo Elmaz Mylsymi që ka prekur gjyqtarin.
Më tej ajo tha se është e gatshme që kjo çështje të ndiqet nga SPAK, dhe se mendon se gjyqtari është duke bërë korrupsion.
“Sapo ka përfunduar seanca gjyqësore, pasi u është rrëmbyer prona nga ana e gjyqtarit Arqile Basho. Gjatë gjykimit ka pasur shtrembërim të fakteve. Është ngatërruar personi që duhet të qëndronte në burg. Elmaz Myslimi është personi që ka prekur gjyqtarin dhe kanë mbajtur gabimisht Fatosh Myslymi që nuk e ka prekur fare me dore. Elmaz Myslimi ka pasur raport mjekësor.
Jam vajza e një prej vëllezërve të arrestuar, problematika jonë fillon nga 2010, ku kemi lidhur kontrata me dy kompani, pronari i njërës prej tyre është këshilltar bashkiak, dhe ka mbajtur poste drejtuese në Vlorë. Problematika jonë nuk lidhet vetëm me pronën në fjalë, pronat janë shitur në disa pronarë të ndryshëm, prej vitesh jemi endur nëpër gjyqe, në 2019 Gjykata e Apelit na ka dhënë të drejtë, zoti Basho ka dalë mbi vendimin e Apelit, duke i dhënë të drejtë këtyre kompanive.
Jam e gatshme që kjo çështje të ndiqet nga SPAK, unë mendoj se gjyqtari është duke bërë korrupsion, ne kemi qenë pronar të truallit, firma nuk ka si mund të shesë hyrjet tona, që janë të caktuara në kontratë. Ky është rast flagrant i korrupsionit që është bërë nga ky gjyqtar”, u shpreh ajo.
