Godasin një gjyqtar brenda ambienteve të gjykatës, prangosen tre vëllezër. Policia e Vlorës ka bërë të ditur se tre vëllezër me mbiemër Myslimi, banues në Vlorë, kanë dhunuar gjyqtarin e Gjykatës së Shkallës së Parë në Vlorë, Arqile Basho, brenda ambienteve të Gjykatës.
Sipas burimeve zyrtare, tre vëllezërit që kanë ushtruar dhunë ndaj gjyqtarit janë Myslim Myslimi 60-vjeç, Fatosh Myslimi 62-vjeç dhe Elmaz Myslimi 64-vjeç. Sipas njoftimeve të para, dhuna është shkaktuar për shkak se tre vëllezërit kanë kundërshtuar vendimin e dhënë nga Basho, dhe pas kësaj e kanë ndjekur atë në ambientet e Gjykatës së Vlorës, ku kanë ushtruar dhunë.
Njoftimi i policisë
“Specialistët për Hetimin e Krimit në Komisariatin e Policisë Vlorë arrestuan në flagrancë për veprën penale “Kundërshtimi dhe goditja e gjyqtarit”, kryer në bashkëpunim, shtetasit M. M., 60 vjeç, F. M., 62 vjeç dhe E. M., 64 vjeç (vëllezër), të tre banues në Vlorë, pasi në bashkëpunim me njëri tjetrin, në ambientet e brendshme të Gjykatës, kanë kundërshtuar me dhunë, shtetasin A. B., 63 vjeç, banues në Gjirokastër, me detyrë gjyqtar në Gjykatën e Shkallës së Parë Vlorë”.
