Presidenti i Turqisë, Rexhep Taip Erdogan e cilësoi si një turp për njerëzimin, dhunën në ndërtesën e Capitol Hill nga mbështetësit e Trump.
Erdogan, i cili ka një miqësi me presidentin Trump, kishte pritur tre ditë para se ta uronte Joe Bidenin për fitoren e tij në zgjedhjet presidenciale të 3 nëntorit.
Por, ai nuk hezitoi që të dënojë ngjarjet e dhunshme të së Mërkurës që sipas tij ndodhën në të ashtuquajturin djep të demokracisë, shkruan Barrons News.
“Ky është turp për demokracinë”, u tha Erdogan gazetarëve të premten në Stamboll.
“Shpresojmë që tranzicioni i pushtetit te Biden në 20 Janar të jetë paqësor dhe se paqja do të kthehet në Amerikë”, shtoi presidenti i Turqisë.
Marrëdhëniet e Ankarasë me Uashingtonin u përkeqësuan pas grushtshtetit të dështuar më 2016, për të cilin Erdogan fajëson klerikun fetar Fetullah Gulen, që gjendet në SHBA. Uashingtoni ka refuzuar thirrjet e Ankarasë për ekstradimin e Gulenit.
Megjithatë, miqësia e Erdoganit dhe Trumpit ka ndihmuar që Turqia të mos jetë subjekt i sanksioneve amerikane, për shkak të përkeqësimit të të drejtave të njeriut.
