Ashtu si ambasadori amerikan në Tiranë, Donald Lu, edhe delegacioni i Bashkimi Evropian në Shqipëri kërkon Prokuror të Përkohshëm.
Kështu, SHBA dhe BE duket se i kanë dhënë një “ndihmë” të madhe mazhorancës për të përfunduar procesin e largimit të Adriatik Llallës si kryeprokuror, me përfundimin e mandatit të tij.
“Ligji për organizimin dhe funksionimin e prokurorisë parashikon dispozita të qarta transitore – siç konfirmohet nga EURALIUS dhe OPDAT në opinionin e tyre në Kuvend. Ne e ftojmë Kuvendin të procedojë në respekt të plotë të ligjit”, thuhet ndër të tjera në reagimin e BE.
Më herët reagoi edhe Ambasada e SHBA-ve në Tiranë, e cila bëri me dije qëndrimin e Donald Lu-së.
Lu mbështet zgjedhjen e një Prokurori të Përgjithshëm të përkohshëm, gjë që mbështetet fort nga mazhoranca dhe kundërshtohet nga opozita, e cila e cilëson si të jashtëligjshme.
Komisioni i Ligjeve ka nisur sot procedurën për zëvendësimin e kryeprokurorit Adriatik Llalla, në përfundim të mandatit të tij 5-vjeçar.
Kështu, Ligjet janë mblidhur për të shqyrtuar memon e hartuar nga Drejtoria e Monitorimit të Institucioneve të Pavarura dhe Sekretari i Përgjithshëm i Kuvendit për këtë çështje.
Por si e sheh ky organ brenda Kuvendit zgjedhjen e pasuesit të Llallës?
EURALIUS dhe OPDAT, e lexon këtë situatë njëlloj si Partia Socialiste dhe mbështet zgjedhjen e një prokurori të përgjithshëm të përkohshëm me shumicë të thjeshtë, pra 71 vota.
Drejtoria për Monitorimin e Institucioneve të Pavarura, me kërkesë të Kryetarit të Komisionit të Ligjeve, Ulsi Manja, ka përgatitur një raport për situatën, të cilin ia ka dërguar edhe kreut të Kuvendit, Gramoz Ruçi.
Por, ndryshe nga PS dhe EURALIUS, Drejtoria e Monitorimit të Institucioneve të Pavarura në Kuvend, thotë se prokurori i ri i përgjithshëm duhet të zgjidhet me shumicën e cilësuar prej 3/5, ose 84 vota, vota të cilat PS nuk i ka pa opozitën.
Kjo drejtori e Kuvendit, teksa parashtron argumentet juridike, thotë se në zbatim të ligjit organik për prokurorinë duhet të zbatohet neni trazitor dhe të zgjidhjet një kryeprokuror i përkohshëm, por shumica e nevojshme për votim duhet të jetë sipas Kushtetutës për kryeprokurorin, pra me 84 vota.
Edhe pse kjo memo e kësaj drejtorie brenda Kuvendit nuk është detyruese, por këshilluese për ata që e kërkojnë, ajo e bën më të vështirë gjetjen e një zgjidhjeje të pa kontestuar për pasuesin e Prokurorit të Përgjithshëm.
E gjitha “rrëmuja” bëhet pasi Këshilli i Lartë i Prokurorisë ende nuk është ngritur ende, një proces i zvarritur që çon në një ngërç për zgjedhjen e Prokurorit të Përgjithshëm mes mazhorancës dhe opozitës.
Megjithatë, kryeministri Rama është treguar i gatshëm të bashkëpunojë me opozitën, ftesë kjo e bërë publikisht dje për zgjedhjen e Kryeprokurorit.
Kështu, kryeministri shkroi në një postim në Facebook se sipas tij “është momenti i duhur për të diskutuar, jo thjesht daljen nga situata e fundmandatit të prokurorit në detyrë dhe hyrjen në fazën e një mandati te përkohshëm me një prokuror të përkohshëm, po nisjen e një faze të re bashkëpunimi mes qeverisë e opozitës në vigjilje të vendimit për çeljen e negociatave të Shqipërisë me Bashkimin Evropian”.
Por, kreu i Partisë Demokratike duket se nuk ka ndërmend të tërhiqet nga qëndrimi i tij lidhur me zgjedhjen e Prokurorit të Përgjithshëm, pas përfundimit të mandatit të Llallës.
Kështu, Lulzim Basha ka refuzuar ftesën e kryeministrit Rama, i cili e ftoi dje publikisht për një zgjidhje të përbashkët për Prokurorin e Përgjithshëm, si një pikënisje të një Pakti Kombëtar “për Europën që duam”.
