Artan Hoxha është shprehur se ish-ministri i Brendshëm, Saimir Tahiri, kishte marrë garanci se nuk do të shkonte në burg. Sipas gazetarit, detyra e Saimir Tahirit është të dalë gjallë nga burgu. Kështu u shpreh gazetari mbrëmjen e kaluar në “Radarin Informativ” në ABC. Duke sjellë në kujtesë se është ministri më jetëgjatë, Hoxha ka thënë se Tahiri duhej të kishte marrë masa para. Në të njëjtën kohë ai nënvizon se Tahiri nuk mund të flasë nga burgu për gjëra që nuk i foli kur ishte jashtë. Ai ka prova dhe fakte sensitive, por kjo sipas gazetarit, vlente pa shkuar në burg.
“Tahiri mund ta kishte bërë dhe duhet ta kishte bërë këtë gjë. Është ministri më jetëgjatë. Kujtoni ngjarjet që kanë ndodhur në detyrën e tij. Ka qenë brenda ai. Sa kulisa dhe luftë ka pasur edhe brenda koalicionit. Tahiri duhet të kishte marrë masa përpara.
I kishin dhënë garanci që nuk do shkonte në burg. Tani është në kontroll 24 orë. Detyra e tij është të dalë gjallë nga burgu. Nuk mund të flasë nga burgu për gjëra që nuk i foli kur ishte jashtë. Sot Saimir Tahiri është njeri i dënuar. Pasi të mbijetojë në burg, mund të bëjë llogaritë nëse ia vlen të bëjë një betejë apo jo. Tahiri ka prova dhe fakte sensitive, por kjo vlente pa shkuar në burg. Tahiri nuk e mendonte kurrë se mund të arrestohej”, tha Hoxha.
Duke kujtuar deklaratën e avokatit Maks Haxhia, Hoxha tha se Tahiri ishte veshur hollë natën e arrestimit, pasi kishte sigurinë që nuk do përfundonte pas hekurave. “Avokati tha se politikanët duhet të vishen trashë, por vetë Tahiri ishte veshur hollë pasi nuk e kishte menduar se do shkonte në burg. Çështjet teknike janë vetëm për kuriozitetin e njerëzve. Tahiri është qytetar, që duhet të vuajë dënimin. Me aq sa kam informacion, fillimisht u tha se do shkonte në burgun e Fierit. Sot është folur për Rrogozhinën. Ai do jetë në burg të sigurisë së zakonshme. Kryesisht aty ka të dënuar për kanabis. Se ata me drogëra të forta dalin. Ka të dënuar që rrinë të vetëm. Ajrimin e bëjnë vetëm pa kontakt me të dënuarit e tjerë. Për rastin e Tahirit do flasë Ministria e Drejtësisë. Tahiri do jetë në një ambient ku mund të mos ketë kontakt me të tjerët”, deklaroi Artan Hoxha.
GJKKO e dënoi Tahirin me 5 vite burg për “Shpërdorim të detyrës”. Por me gjykim të shkurtuar dënimi ulet në 3 vite e 4 muaj burg. Tahiri u dënua vetëm për “Shpërdorim detyre” duke i ‘shpëtuar’ akuzave “Korrupsion të zyrtarëve të lartë”, “Trafik të lëndëve narkotike kryer në bashkëpunim” dhe “Grup të strukturuar kriminal”.
Në argumentimet e vendimit, Apeli i GJKKO nënvizon se rezulton se Tahiri ka lidhje me Moisi Habilaj dhe Artan Habilaj dhe këto lidhje kanë ndikuar që grupi kriminal të infiltrohet në radhët e punonjësve të policisë dhe të shtetit, dhe të pengojë luftën ndaj trafikut të drogës. Sipas gjykatës, Tahiri provohet se ka përfituar nga Moisi Habilaj dhe Artan Habilaj për përfitime të padrejta dhe njëkohësisht “shpërdorimi i detyrës”, duke dëmtuar interesat e shtetit.
