Ish-ministri i Brendshëm, Saimir Tahiri është paraqitur paraditen e sotme në Gjykatën e Krimeve të Rënda, pas vendimit të kësaj të fundit për t’i bllokuar pasaportën.
Tahiri ka qëndruar brenda gjykatës rreth 1 orë, ku ka dhënë dëshminë e tij, ndërsa gjykatësja Liljana Baku ka vendosur të lërë në fuqi masën për bllokimin e pasaportës, duke penguar ish-ministrin Tahiri që të dalë jashtë shtetit.
Por, çfarë ka dëshmuar deputeti në Gjykatën e Krimeve të Rënda?
Mësohet se Tahiri është shfaqur i qetë në sallën e gjyqit, ndërsa që në nisje të seancës, ai është shprehur para trupit gjykues se ka marrë dijeni për vendimin. Më tej, ai është shprehur se në vazhdim do të ishte avokati i tij mbrojtës Maks Haxhia, i cili do të fliste për akuzat e Prokurorisë së Krimeve të Rënda.
Pas qëndrimit të avokatit, fjalën e ka marrë Tahiri, i cili mësohet se ka thënë:
“Nuk ka asnjë problem nga masa shtrëngues. Nuk kas asnjë arsye të largohem jashtë vendit. Dua që të zbardhet sa më shpejt e vërteta. Unë kam udhëtuar shpeshherë jashtë vendit, me makina të ndryshme. Por nuk kam udhëtuar me persona të inkriminuar”, ka deklaruar Tahiri.
Në pjesën e dytë të seancës, Tahiri është shfaqur emocional, madje nuk kanë munguar as batutat mes Saimir Tahirit dhe avokatit të tij mbrojtës teksa linin sallën e gjyqit.
Pasi kanë dalë jashtë Gjykatës, Tahiri ka preferuar të mos flasë para medieve, por është avokati i tij Maks Haxhia ai që tha para kamerave se do e apelojë këtë vendim, duke akuzuar gjykatën se është kthyer në një notere të kërkesave të Prokurorisë:
“Tahiri është deputet i Shqipërisë, dhe askush nuk është më shumë i interesuar se ai për të zbardhur të vërtetën, pasi është përbaltur politikisht dhe jo vetëm. E prisnim vendimin e gjykatës, por çështjen do ta çojmë në Apel. Gjykata është kthyer në noter të Prokurorisë”, u shpreh avokati Haxhia.
