Një 18-vjeçare humbi jetën, e një tjetër mbeti i plagosur në një aksident të rëndë të ndodhur në Borsh. Nga ky aksident humbi jetën Analuiza Duro, 18-vjeçe, e cila ishte në vit të fundit në shkollën e mesme. E ndjera ndodhej në makinë bashkë me të fejuarin e saj, Robert Dhuli, 19-vjeç, kur ndodhi aksidenti.
Teksa po përpiqej t’i mësonte makinën të fejuarës, kjo e fundit ka humbur kontrollin e automjetit duke përfunduar në një kanal. Aksidenti i rëndë me një të vdekur, ka ndodhur pasditen e së premtes, rreth orës 17:20 në vendin e quajtur mbi Shkallë në Borsh. Drejtuesi i mjetit Robert Dhuli është shoqëruar në Komisariatin e Policisë Sarandë, për veprimet e mëtejshme procedurale.
Dyshohet se vajza ka qenë duke bërë guidë për të mësuar makinën, në momentin kur mjeti ka humbur kontrollin dhe ka përfunduar në një kanal kullues, duke gjetur vdekjen e menjëhershme. Në momentin që makina ka rënë në ujë, 19-vjeçari ka arritur të dalë, por e ka pasur të pamundur të shpëtojë të fejuarën, e cila për pasojë është mbytur. Pavarësisht se ai kërkoi ndihmë te banorët, të cilët njoftuan edhe policinë dhe zjarrfikëset, për vajzën 18- vjeçare ishte shumë vonë.
