Shtetasi Ronald Kryemadhi, terrorizoi jo vetëm banorët në Kamëz por edhe Policinë e Shtetit dhe forcat e FNSH e RENEA, pasi i kërcënoi me armë. Policia ka reaguar për ngjarjen e ndodhur në Kamzë, ku Ronald Kryemadhi nuk u është bindur urdhrit dhe i ka kanosur me pistoletë.
Në një reagim për mediat, policia sqaron se efektivët kanë shkuar në banesën e tij, për ta shoqëruar në gjykatë, por ai u është përgjigjur me armë. Kryemadhi është shoqëruar në ambientet e Komisariatit të Policisë Nr. 5, për veprimeve të mëtejshme.
Drejtori i Policisë Tiranë, Rebani Jaupi, sqaroi se bëhej fjalë për një besimtar, i cili iu kishte ndaluar vajzave të tij që të shkonin në shkollë.
Jaupi tha se policia ka shkuar fillimisht për të bërë shoqërimin e tij në gjykatë, pasi ai ndiqet penalisht me akuzën e ‘dhunës në familje’. Kur policia ka hyrë në banesën e tij, Kryemadhi ka nxjerrë armën, dhe në këtë moment situata është agravuar.
